Penetential Psalms Psalm 37 PEREGRINUS JAN 21

Lord, ne wyþ-nyme me noȝt in þyn ire.¹ For þyn a-sautes ben ficched to me, and þou confermed vp me þyn helpe. Helþe nys nouȝt in my flesche for þe charge of myn synȝes. For myn wickednesse ben ouergon myn heued, and as a greue charge hij ben greued up me. Min helynges oþer helþes a-bouen roteden, and ben corrumped of þe charge of myn vncunninges. Ich am made wroched and croked vnto ende, and ich entred al day sorȝful. For myn baches ben fulfild of illusiouns; and helþe nys nouȝt in my flesshe. Ich [am] turmented, and ich am michel lowed; and ich cried fram þe sorweyng of myn hert. Lor, al my desire is to-fore þe; and my waymentyng nys nouȝt hid fram þe. Myn hert his tribled in me; my uertu haþ forsaken me, and þe liȝt of myn eȝen, and þat nys nouȝt wyþ me. Myn frendes and myn neȝburs com to-wardes me and stoden. And hij þat weren by me stoden fer fram me, and hij þat souȝten my soule made force. And hij þat soȝten iuels to me speken uanites; and aldai hij þouten trecheries. Ich for-soþe [as defe] herd nouȝt, and as doumbe nouȝt openand his mouþe. And ich am made as man nouȝt herand and nouȝt hauand vnder|nimynges in hys mouþe. For ich hoped in þe, Lord; Lord, my God, þou shal here me. For y seid, þat myn enemys ne ioien nouȝt vp me, and spoken grete þynges vp me, þer-whyles þat my fete ben stired. For ich [am] made radi in tourmentes, and my sorowe ys alway iu my syȝt. For ich shal tellen my wickednesse & þenche for my sinȝe. Myn enemys for-soþe liuen, & ben confermed vp me; and hij, þat hateden me wickedlich, ben multiplied vp me. Hij þat ȝelden iuels for godes, bakbytyng me, for þat ich folwed godenes. Ha Lord, my God, ne forsake me nouȝt, and ne depart nouȝt fram me. Lord God of myn helþe, vnderstonde in-to myn helpe. © 2024 Peregrinus 548 Market Street PMB 72296, San Francisco, CA 94104